藝術家John Ho｜專訪｜讓愛化作夢幻之旅

藝術家John Ho｜專訪｜讓愛化作夢幻之旅

John Ho 何達鴻

John Ho 何達鴻，香港人，藝術家，繪本畫家及平面設計師，現居日本橫濱進行藝術創作。創作主人公「肉肉熊」，他的作品帶有夢幻的童真玩味，感性的畫意也不失幽默感。

Q1/ 你大多以城市風景或旅行作為作品及展覽的主題，為什麼會有這個構想?

A: 好多時候，我都係由自身體驗去成為作畫嘅靈感，自己嘅居住地由香港變咗日本，都想分享自己嘅體驗俾觀眾，另外我都好欣賞每個地方有唔同嘅風貌，各有特色，唔同城市生活有唔同嘅心境，去外國生活都係想多啲體驗，化成靈感去創作。

Q2/ 在日本留學以至移居當地，對你的創作風格有甚麼影響?

A: 對比返舊作同埋新作顏色都有好大分別。其實喺日本一個人生活，少咗好多約會，咁就多咗好多時間去繪畫，靜靜去思考人生，體驗人生；就好似去修行一樣，自己同自己相處，所以好多主題都係圍繞一個人在日本，有孤獨、有夢想、有不同嘅幻想。另外日本亦都有好多展覽、美術館，所以睇多咗好多藝術作品。

Q3/ 在創作以香港及日本為背景的作品時，內心的心境有何不同?

A: 實際上，兩個地方各有各我喜歡之處，日本嘅風景、人文感覺活得比較優雅；而香港就有種草根嘅味道，不優雅卻有點隨意、沒什麼拘束。我想表達嘅係雖然兩個地方風格都好唔同，但我都想將每個人變成可愛化，呢個係我眼中嘅世界，想藉着我嘅作品令世界可愛一點。

Q4/ 可以分享在日本最難忘的一次辦展經驗嗎?

A: 去年11月喺日本開咗個個人畫展，日本認識嘅朋友、香港嘅家人、朋友都嚟咗現場睇，每日都收到好多好多嘅愛。最難忘係同當地嘅畫廊負責人交談，發現經營一間畫廊係一件有趣又神聖嘅事，彷彿為別人達成夢想，啟發咗我都想去開一間畫廊。

跟日本畫廊嘅負責人用email聯絡，就會上款下款要講好多門面嘅說話，例如辛苦晒、多多指教、多謝照顧等等，令到成封email好長，好公式、極度禮貌。

Q5/ 除了肉肉熊及花花貓外，可以介紹一下你的其他創作嗎?

A: 肉肉熊及花花貓係我兩個主角色，一男一女好似係情侶咁樣為我說故事，其他角色就好似點綴咁，都係令畫面可愛一點。其他創作例如我有出版書，每本書都有唔同嘅主題，有日本嘅遊記、有關於流行曲嘅、有香港嘅生活日常以至不同年代的變化等。我亦有自己嘅品牌產品、專頁、動畫、短片等，都係創作嘅一種。

Q6/ 可以介紹一下最近回港舉辦的展覽嗎?

A: 今次呢一批展出嘅作品，都係喺日本嘅兩年半生活集大成，全部都係由日本空運過嚟，記錄用我嘅眼睛我嘅心境去睇日本、對愛嘅幻想、想向日本嘅可愛文化作出致敬。我一直都堅持每張畫作都要有愛呢個元素，因為有愛先至會感動到人。

喺靈基營呢個二級歷史建築辦展，要上山先到達，係一個特別嘅畫廊地方。呢個背景為自然環境嘅展覽空間，更能帶出富人情味嘅感覺，睇展覽之餘亦都可以參觀呢座古建築。

Q7/. 給同樣在創作路上的插畫師或藝術家的說話

“選擇呢條創作路，先要唔怕孤獨，而係一趟自由自在嘅旅程。作品係永恆的，能用自己作品去影響別人，對自己生命都賦予多一種意義。”
-
(圖片來源：JOHN HO官方)
-

《讓愛化作旅程》John Ho 何達鴻

John Ho Solo Exhibition — Love as a Journey

日期: 即日起至4月27日

時間: 12:00-18:00 (星期一至六) /12:00-17:00 (星期日)

地點: 102 Sha Tin Tau Tsuen, Sha Tin @highrock_stewards

-

香港本地藝術家介紹｜John Ho 何達鴻

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山藝社，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於"藝術良品入手"購物平台專區購買，支持本土藝術！
-
Additional Link:
1. JOHN HO 之Instagram: @johnhohoo
2. 何達鴻 John Ho — 肉肉熊遊歷記｜藝城遊記
3. my903訪問｜急急看：JOHN HO與肉肉熊到橫濱畫下生活日記